التكنولوجيا سلاح ذو حدين
فى العربى الفصحى. بيستخدمو كلمة "التِّقَانَةُ",[1] بس فى مصر ,و فى شوية دول عربيه غيرها, الناس بتستخدم كلمة تكنولوجيا زى ما هيا و دا بسبب ان من طبيعة اللغه المصريه انها بتستلف الكلمات التقنيه زى ما هيا من غير ما تغير فيها حاجه.
مع بداية القرن ال19, الاوروبيين بدأو يستخدمو مصطلحات زى Technik (المانى) او technique (فرنسى) كدلاله لـ"طريقة عمل الشئ" و كانت بتتقال على كل الفنون التطبيقيه, زى الرقص و الملاحه و الطباعه, بغض النظر كانو محتاجين ادوات او لا.[5] فى الوقت دا, Technologie (المانى و فرنسى) إما كان بيشير للتخصص الاكاديمى اللى بيدرس "طرق الفن و الحِرَف", او التخصص السياسى اللى "بيشرع شغلانات الفنون و الحرف".[5] الفرق مابين المصطلحين, تكنيك و تكنولوجي, مش موجود فى الانجليزي, و الاتنين بيتقال عليهم تكنولوجى (Technology). المصطلح كان نادر فى الانجليزى و غالبا كانو بيستخدموه للتخصص الاكاديمي, زى فى معهد ماساتشوستس للتكنولوجيا.[6]
فى القرن ال20, كنتيجة للتقدم العلمى و الثوره الصناعيه التانيه. مصطلح تكنولوجى مبقاش تخصص اكاديمى بس و بقا له معنى جديد: استخدام المعرفه للوصول لنتايج.[5]
راس فاس حجرى من قبل التاريخ
الانسان البدائى عمل الادوات الحجريه عن طريق الملاحظه و التجربه. الانسان اتعلم ازاى يعمل الادوات دى حوالى 2 مليون سنه من دلوقتى بإنه يخبط الحجر فى بعض عشان يسنه و يشكله بالشكل اللى عايزه و يعمل الفاس الحجرى. الطريقه دى اتطورت 75 الف سنة من دلوقتى و بقو بيستخدمو النحت الضغطى (الضغط بزوايا معينه و قوه معينه) عشان يعملو الادوات بدقه اعلى.[7]
تشارلز داروين وصف اكتشاف النار انه "غالبا اعظم اختراع للانسان."[8] علما الاثار بيقولو ان البشر كانو بيستخدمو النار "بشكل مستمر" على الاقل حوالى 1.5 مليون سنه.[9] النار اللى مصدرها الخشب و الفحم العضوى ساعدت الانسان زمان انه يطبخ اكلهم عشان يسهلو هضمه, و دا خلّاهم يستفادو بالاكل اكتر و يزود انواع الاكل اللى ممكن يكلوها.[10] فرضية الطبخ بتقترح احتمالية ان تعلم الطبخ زود حجم الدماغ للبشر وقتها, بس فى باحثين كتير مش مقتنعين بالأدله.[11] علما الاثار لقو ادله على استخدام المستوقدات من 790 الف سنه. الباحثين مقتنعين ان دا غالبا ساعد فى تكوين مجتمعات مٌنظمه اكتر, و بالتالى ساعد فى تطور اللغات فى المجتمعات دى.[12]
فى برضو اختراعات تانيه اتعملت فى فترة العصر الحجرى القديم و منهم اللبس و المسكن.[13] مفيش اتفاق لسه مابين علما الاثار على وقت ظهور الاختراعين دول, بس فى ادله على وجود لبس مابين 90-120 الف سنه فاتو, و المسكن من 450 الف سنه.[13] مع تقدم الوقت فى فترة العصر الحجرى القديم, المساكن اتطورت. البشر بدأو يبنو اكواخ خشب من 380 الف سنة.[14] الهدوم كانت بتتعمل من فرو و جلود الحيوانات اللى كانو بيصطادوها, و دا ساعدهم انهم يروحو لاماكن برد اكتر, و الناس ابتدت تهاجر من الاماكن الحر فى افريقيا لاماكن ابرد فى اوراسيا (اوروبا و اسيا).